Итали улсын засгийн газраас тус улсын нутаг дэвсгэрт хөдөлмөр эрхэлдэг бүх хүнээс вакцины гэрчилгээ шаардах шийдвэр гаргажээ. Энэ нь европ тивдээ анхных бөгөөд, дэлхий дахинаа ч коронавирусийн эсрэг хэрэгжүүлж буй хамгийн хатуу журмуудын нэгт тооцогдож байгаа юм.

Хэдийгээр Итали улсын хувьд коронавирусийн вакцины гэрчилгээг аль хэдийн хэрэглээнд нэвтрүүлж, дижитал болон цаасан хэлбэрээр галт тэрэгний буудал, кино театр, зоогийн газар, фитнесс, усан сан зэрэг нийтийн үйлчилгээний цэгүүдэд шаардаж байсан ч дельта хувилбарын тархалт огт буурахгүй байгаа юм.

Тиймээс тухайн шийдвэрийн хүрээнд хөдөлмөр эрхлэгч вакцины гэрчилгээгүй л бол ажлаасаа чөлөөлөгдөх бөгөөд таваас дээш хоноход цалинг нь бодохгүй гэжээ. Мөн хувийн өмчит байгууллага, хувиараа хөдөлмөр эрхлэгч байхаас үл хамааран вакцины гэрчилгээгүй бол ажил олгогч хийгээд ажилтанд 1280 хүртэлх фунтийн торгууль ногдуулахаар журамласан байна.

Итали улсын зүгээс энэхүү шийдвэрээ ирэх сарын 15-ны өдрөөс хэрэгжүүлж эхлэхээр тогтож, ард иргэдийн вакцинжуулалтад хамрагдах идэвхийг нэмэгдүүлнэ гэж найдаж байгаа ажээ.

Одоогийн байдлаар Итали улсын нийт хүн амын 65 хувь нь вакциндаа бүрэн хамрагдсан байна.

Эх сурвалж: BBC