Мексикийн засгийн газар өчигдөр буюу лхагва гарагт Бостонд байрлалтай Нэгдсэн улсын холбооны бүсийн шүүхэд галт зэвсэг үйлдвэрлэгчдийн эсрэг иргэний гомдол гаргасан байна.
Ерөнхийлөгч Андрэс Мануэл Лопез Обрадорын засгийн газар улсынх нь хойд хилээр орж ирдэг Нэгдсэн улсын галт зэвсгийн урсгалыг таслан зогсоох ажлыг нэн тэргүүнд тавьсан билээ.
Тус ажлын хүрээнд мансууруулах бодис худалдаалагчид, гэмт этгээдүүдэд хууль бусаар галт зэвсэг наймаалахад туслалцаа үзүүлж буй компаниудын эсрэг ийнхүү гомдол мэдүүлж байгаа ажээ. Энэ нь буруутай этгээдүүдийн учруулж буй нөр их хохиролд цэг тавихын төлөө авч байгаа арга хэмжээ гэнэ.
Мексикт сүүлийн жилүүдэд хүн амины хэрэг маш их гарч байгаа бөгөөд учирсан гарз хохирлыг мөнгөн дүнгээр тооцвол 10 тэрбум ам.доллар хүрэхийг албаныхан мэдээлжээ.
Мөн тэдний хэлж байгаагаар гэмт хэргийн газраас олддог ихэнх буу АНУ-аас нууцаар хил давуулсан байдаг гэнэ.
Тийнхүү гомдлын хүрээнд АНУ-д байршилтай хэд хэдэн компанийг буруутгасан бөгөөд тэдгээрээс дурдвал, Смит энд Уэссон, Бэррет, Беретта, Колт, Интерстэйт Армс нар багтжээ.
Эх сурвалж: DW