Та шинэ зүйлийг яаж сурдаг вэ? Таныг сур гээд компьютер өгвөл гарын авлагатай нь хамгийн түрүүнд танилцах уу? Эсвэл шуудхан асаагаад доторх программуудыг нь ухах уу? Нэг бол мэргэжлийн хүний урд тавиад дэргэдээс нь харах уу? Суралцах явцад таны илүү үр дүнтэй гэж боддог арга замыг суралцах хэв маяг гэдэг.

Судлаач Давид Колб хувь хүний сурах дуртай арга барилын талаар судалгаа явуулжээ. Тэрээр насанд хүрсэн хүмүүс мэдээллийг хэрхэн хүлээн авч, дамжуулдаг талаар нэгэн нээлт хийсэн юм. Энэ бол суралцагч мэдээллийг шингээн авдаг хоёр арга юм. Зарим хүмүүс амьдралын жинхэнэ туршлага, жишээ, бодит туршлагыг дээр гэж үздэг. Харин нөгөө нэг хэсэг нь загвар, санаа бүхий хэлбэртэй буюу хийсвэр ойлголтод дуртай байдаг. Мэдээг хүлээн авсны дараагаар зарим хүмүүс идэвхтэй туршилт хийх сонирхолтой байдаг. Харин нөгөө хэсэг нь мэдээллийг тунгааж, ажиглах дуртай.

Ажиллагчдыг бэлтгэх, хөгжүүлэх хөтөлбөрүүд хэрэгжүүлэхдээ хувь хүний суралцах хэв маягийг анхаарснаар тэднийг суралцах бүхий л үе шатдаа өрсөлдөхүйц хэмжээний суралцагч болоход нь туслах юм.

Суралцах хэв маягийг тодорхойлох энгийн атлаа түгээмэл хэрэглэгддэг арга бол суралцагчийн харах, сонсох чадвар дээр суурилах юм. Харж суралцдаг хүмүүс өнгөлөг материалаар дүүрэн хүснэгт, диаграм, зураг зэргээр үлдсэн илтгэлээ дэмжсэн, чимсэн байхад дуртай. Харин сонсож суралцдаг хүмүүс илтгэл, тайлбар сонсох, тухайн ойлголтын талаар бусадтай ярилцах замаар сурах дуртай. Харин хүрэх мэдрэхүйгээ ашиглан суралцдаг хүмүүс шинэ зүйл сурахдаа гараа оролцуулж, биеийн хөдөлгөөн хийх маягаар суралцах сонирхолтой байдаг. Тэд хөдөлгөөн хийж байхдаа хамгийн сайн суралцдаг: ажил хийх, бичих, зурах, алхах гэх мэт.

Ажиллагчдын суралцах хэв маягийг олж, бэлтгэл сургалтандаа нэвтрүүлснээр тэдний суралцах чадварыг дээшлүүлэх боломжтой юм.