Найруулагч Жорж Миллерийн шинэ бүтээл “Фуриоса” буюу “Галзуу Макс: Хилэнт зам” киноны өмнөх үйл явдлыг өгүүлэх тус кинонд жүжигчин Аня Тейлор-Жойн бүтээсэн гол дүр ердөө 30 мөр үгтэй аж.

Гол дүоүүд нь барагтай бол ам нээдэггүйг сайн мэдэх тус кино цувралын үнэнч үзэгчдэд энэ тийм ч цочирдмоор мэдээ биш билээ. Гэвч Тейлор-Жойн хувьд Милл­ерийн Фуриоса арай дэндүү дуугүй санагджээ.

Тухайлбал, Нью-Йорк Таймсд өгсөн ярилцлагадаа тэрээр “Би зураг авалтын хэдэн сарын турш бараг юм ярьсангүй. Энэ дүрд тоглохдоо амьдралдаа хэзээ ч ганцаардаж үзээгүйгээрээ их ганцаардлаа. Их асуудал тоочмооргүй байгаа ч миний хялбар бүтнэ гэж бодож явсан бүхэн маш бэрх даваа байлаа. Жоржийг хайрлаж хүндэлдэг, ийм бүтээлийг түүнээс илүү хийх хүн байхгүй гэдгийг би бүрэн итгэлтэй хэлнэ. Гэхдээ Фуриосагийн төрхийн талаар түүний санаа дэндүү чанга байснаас болоод би киноны туршид амаа жимийж, бүх сэтгэл хөдлөлөө нууж, үргэлж нүдээрээ ярих шаардлагатай байлаа” гэжээ.

Тейлор-Жой дэлгэцийн уран бүтээлд эмэгтэй дүр асар хүнд бэрхшээлийг ганц нулимс дуслуулсан болоод л давчхаж байгаагаар дүрсэлдэг жишигт дургүй хүний хувьд Фуриоса тэсэртлээ уурлах эрхтэй хэмээн Миллэрт удаа дараа хэлж байсан гэнэ.

Тэрээр “Бид чинь амьтад шүү дээ. Галзууртлаа уурлах, сэтгэл хөдлөх үе бүгдэд бий. Шинэ кинон дээр нэг удаа хашхираан сонсогдоно. Та нарт л гэж хэлэхэд би тэгж хашхирахын тулд бүтэн гурван сар хөөцөлдсөн юм шүү. Жоржоор тиймэрхүү юм зөвшөөрүүлнэ гэдэг ярвигтай. Эхлээд санаагаа хэлчхээд хэсэг хаяна. Байж байгаад дахиад асууна. Тэгээд дахин дахин давтана” гэжээ. Зарим эх сурвалжийн хэлж байгаагаар Тэйлор-Жой дүрийнхээ үгэнд нэг хашхираан нэмүүлэх гэж найруулагчийнхаа өмнө уйлж ч үзсэн гэнэ.

Эх сурвалж: Variety